Norddeutsche Sprache

Dat kann angahn, dat de ole Senaat de Hamborger Börgerschop nich ümmer de ganze Wohrheit to den Elbphilharmonie-Schlamassel vertellt hett. Dat geiht üm hunnertsöben Millionen Euro, de se in´n Harvst tweedusendacht noch maal extra rinscheten müssen. Dormaals sä de Senaat, dat en externen Gootachter dat nakeken harr, wat de Bokonzern Hochtief hebben wull. Aber dat gifft woll nee Ünnerlagen, dor süht dat so ut, dat poor Gootachten erst achteran maakt worrn sünd. Stand: 25. Mai 2012 Klock 8:30

In´n Senaat schüllt se bold öber´n Huusholt beraden. Sozialsenater Detlef Scheele hett al maal seggt, wo genau he sporen will. Hier bi NDR negentig komma dree twiefel he to´n Bispill an den Sinn vun Kinnerkuren op Föhr. Wenn de weg fallt, denn wörr alleen dat in´t Johr twee Millionen Euro sporen. Scheele sä aber ok, dat se Kinner vun Familien, de würklich to knapsen hebbt, wiederhen bi´t Verholen ünner de Arms griepen ward. Stand: 25. Mai 2012 Klock 8:30

Bunnesregeern un Opposition sünd sik noch nich enig öber den europääschen Fiskalpakt. De Union will den Bunnesdag dor noch vör de Summerpaus öber afstimmen laten. SPD un Gröne wüllt, dat dor noch mehr för daan ward, dat de Weertschop wassen kann. De Regeern bruukt en twee-Drüddel Mehrheit in Bunnesdag un Bunnesraat, dat heet, dor mutt de Opposition mitstimmen. Stand: 25. Mai 2012 Klock 8:30

Dat Depermaken vun de Elv is en Enn wieder. Vun hüüt af an liggt de Plaanfaststellensbeschluss ut. Wat de Behörd för Weertschop seggt, künnt se in all Gemeenden, de dat angeiht, dor nu rinkieken. Ümweltschützers sünd bang, dat Vörhebben kunn in de Tier- un Plantenwelt Schaden maken, de een nich mehr ut de Welt schaffen kann. Kossen schall dat Depermaken fiefhunnert Millionen Euro. Stand: 25. Mai 2012 Klock 8:30

Wat dat Organspennen angeiht, dat will de Bunnesdag vundaag ganz nee beslüten. In tokamen Tied schall dat so ween, dat de Krankenkassen jümehr Versekerten fraagt, ob se jümehr Organe spennen wüllt, wenn bi jüm de Bregen al doot is. Se mütt denn blooß noch jo oder nee seggen. In´n Bunnesdag sünd se sik seker, dat dat för düssen Weg vundaag en grote Mehrheit geven ward. Stand: 25. Mai 2012 Klock 8:30