Över dat Westfield-Inkoopscenter in’e Havencity warrt al, siet se mit dat Boen anfungen hebbt, veel wat över snackt un dat faken ok gor nich goot. Fief dode Boarbeiders, nadem dor en Rüstwark tohoopfullen is, dat is bet nu woll de slimmste ween vun en ganze Reeg Unfäll. Dat Ganze hett de Staatsafkaatschop nu ok to’n NDR so seggt, dat se dat so sehen doot. Gasbuddels, sünd in’e Luft flagen, Kabels nich isoleert ween un Boarbeiderlüüd, sünd to Schaden kamen. Dat Wekenblatt "Die Zeit" schrifft nu bavento ok noch vun dubiose Arbeitsverdrääg.
Hebbt Russland un China op Politikers vun’e AfD op inwarkt? Dor sett sik vundaag nu de Bunnsdag mit ut’nanner. Nadem en Mitarbeider vun’e AfD fastnahmen worrn is, wiel dat he womööglich för China snüffelt hett, fangt se nu vöraf an ok bi Maximilian Krah to kieken. De böverste AfD-Politiker för de Europawahl schall womööglich Geld ut China un Russland kregen hebben. Bavento hebbt se denn ok noch Petr Bystron vun’e AfD op’n Kieker. Bi beide geiht dat nu eerstmal üm de Fraag, wat düsse anfängliche Verdacht villicht wohrhaftig stimmen kunn.
Krüüzfohrtscheep bi uns in’e Stadt, de ne ganze Reeg wat an Sott in’e Luft pusten doot: In’e Börgerschop güng dat güstern ok üm de Sundheit vun’e Lüüd in Hamborg. De Linke verlangt, dat dor Sluss mit is mit düssen ganzen Dreck in’e Luft in’n Haven un will, dat dor scharpere Vörgaven gellen doot för de Krüüzfohrtscheep. Bavento güng dat in’e Börgerschop ok üm Antisemitismus. Denn wiel de tonehmen deit, hett sik de CDU för en Israel-Lehrstohl an’e Uni för utsnackt. Dor schall nu de Wetenschopsutschuss över beraden.
De gröttste Container Rederee op’e Welt MSC will nich blots bi’n Hamborger Havenbedriever HHLA mit instiegen. Op’n Plaan steiht ok en grote Rederee för Autotransporters, de Gram Car Carriers. Un de is eng mit Hamborg verbannelt. De Traditschoonsrederee F. Laeisz un de Hamborger Redereefamilje Schües hebbt Andelen an de Gram Car Carriers. Beide wüllt se nu verköpen.
För de Lüüd, de in’n Grandweg in Looksteed wahnen doot, schall dat al bald wedder wat ruhiger üm jüm rüm warrn. In’n Mai schall dor en so nöömte "Diagonalsparr" henkamen. Dat sünd witt-rode Pielers un lütte Verkehrsinseln. So schall dat denn op de Utwiekstreck vun’n Lokstedter Steendamm in Tokumst wat sinniger togahn. Radfohrers un Reddenswagens hebbt dorgegen denn to’n normalen Autoverkehr wiederhen fre’e Fohrt.
Albert von Monaco un sien Fro Charlène besöökt Hamborg. Denn dor maakt se hüüt in dat Miniatur Wunnerland offizjell en ganz ne’e Eck apen, wo sik dat allens wat üm Monaco dreihen deit. Wokeen dor egens ganz normaal henwull, för den is dat Miniatur Wunnerland vundaag aver deswegen dicht. Se köönt sik denn dat ne’e Mini-Monaco af morgen ankieken. De Besöök vun dat Förstenpoor is aver en private Reis un keen Staatsbesöök vun Amts wegen her.
Hüüt Morgen kriegt wi villicht noch so’n beten wat de Sünn to sehn. Meisttiets sünd aver veel Wulken ünnerwegens. Man gröttstendeels blifft dat dröög. To’n Namiddag hen süht dat aver al ’n beten wat anners ut. Dor sünd denn ok Regenschuer mööglich, enkelt villicht ok mal dat een oder anner Gewidder. De Temperaturen liegt vundaag bi üm un bi acht Graad. Morgen süht dat meist jüst so ut as vundaag. Dor warrt dat aver al ‘n Tick warmer. Un dat Wekenenn warrt denn richtig fein un warm: Sünnavend bi bet to 17 Graad un Sünndag bi bet 21 Graad.