Die Welt snackt Platt

De HSV söcht nu düchtig na en nee´en Sportdirekter. Güstern Avend harr de Hamborger Sportvereen künnigt maakt, dat he sik vun Frank Arnesen trennt hett. As Nafolger snackt se över Jörg Schmadtke, Oliver Kreuzer un Felix Magath. Noch düssen Maand wöllt se sik mit en vun de Kandidaten enigen.
Stand: 23.05.213, Klock halvig negen
Plattdüütsch: Cornelia Ehlers

Vör dat Champions-League-Finale an´n Sünnavend hett dat in London en slimmen Anslag geven. En britsche Suldaat is in de Neegde vun en Kaseern meern op de Straat doot maakt wurrn. De Polizei hett de beiden Männslüüd, de dat woll daan hebbt, anschaten un to faten kregen. Premiereminister David Cameron geiht dorvun ut, dat dat en Terrorakt ween is. He hett dat nationale Sekerheitskabinett Bescheed seggt.
Stand: 23.05.213, Klock halvig negen

De Atomtransport, över de se sik all strieden doot, is nu in Brokdörp ankamen. De LKW harr söss Brennelementen mit Plutonium ut Belgien laden un keem güstern an, sä en Sprekersch vun de E.ON.
De Lüüd, de gegen Atomkraft sünd, hebbt bekriddelt, dat de Transport woll nich seker noog is.
Stand: 23.05.213, Klock halvig negen

De Hamborger Grönen maakt sik stark dorför, dat de Hamborgers mehr afstimmen dörvt.
De Senaat schull vun sik ut de Möglichkeit hebben, de Bevölkerung to bestimmte Themen afstimmen to laten. De Grönen-Chefin Katharina Fegebank hett verkünnt, dat sik en Lütte Parteidag in de tokamen Week för en Referendum na Schweizer Modell stark maken will.
Stand: 23.05.213, Klock halvig negen

In den Hamborger Groot- un Butenhannel hett de Gewerkschop ver.di hüüt in mehrere Ünnernehmen to korte Streiks opropen. Drapen deit dat ünner annern all Metro-Ladens, man ok de groten Pharma-Groothändlers in Hamborg.
Ver.di will 6,5 Perzent mehr Geld för de Arbeitsnehmers. De Arbeitsgever harr bet nu rund 2 Perzent anbaden.
Stand: 23.05.213, Klock halvig negen

De Hamborger Polizei söcht Tügen, de wat vun en Vergewaltigung in´t Schanzenviddel mitkregen hebbt. En Unbekannte is Pingstmaandag an´n Morgen woll achter en 17-Johrige achteran ween un hett ehr op en Speelplatz sexuell missbruukt.
De Mann, de dor woll achter stickt weer üm un bi 25 Johr oolt un snack Engelsch mit spaanschen Akzent.
Stand: 23.05.213, Klock halvig negen