Norichten op Platt

Dat kann angahn, dat de ole Senaat de Hamborger Börgerschop nich ümmer de ganze Wohrheit to den Elbphilharmonie-Schlamassel vertellt hett. Dat geiht üm hunnertsöben Millionen Euro, de se in´n Harvst tweedusendacht noch maal extra rinscheten müssen. Dormaals sä de Senaat, dat en externen Gootachter dat nakeken harr, wat de Bokonzern Hochtief hebben wull. Aber dat gifft woll nee Ünnerlagen, dor süht dat so ut, dat poor Gootachten erst achteran maakt worrn sünd. Stand: 25. Mai 2012 Klock 8:30

In´n Senaat schüllt se bold öber´n Huusholt beraden. Sozialsenater Detlef Scheele hett al maal seggt, wo genau he sporen will. Hier bi NDR negentig komma dree twiefel he to´n Bispill an den Sinn vun Kinnerkuren op Föhr. Wenn de weg fallt, denn wörr alleen dat in´t Johr twee Millionen Euro sporen. Scheele sä aber ok, dat se Kinner vun Familien, de würklich to knapsen hebbt, wiederhen bi´t Verholen ünner de Arms griepen ward. Stand: 25. Mai 2012 Klock 8:30

Bunnesregeern un Opposition sünd sik noch nich enig öber den europääschen Fiskalpakt. De Union will den Bunnesdag dor noch vör de Summerpaus öber afstimmen laten. SPD un Gröne wüllt, dat dor noch mehr för daan ward, dat de Weertschop wassen kann. De Regeern bruukt en twee-Drüddel Mehrheit in Bunnesdag un Bunnesraat, dat heet, dor mutt de Opposition mitstimmen. Stand: 25. Mai 2012 Klock 8:30

Dat Depermaken vun de Elv is en Enn wieder. Vun hüüt af an liggt de Plaanfaststellensbeschluss ut. Wat de Behörd för Weertschop seggt, künnt se in all Gemeenden, de dat angeiht, dor nu rinkieken. Ümweltschützers sünd bang, dat Vörhebben kunn in de Tier- un Plantenwelt Schaden maken, de een nich mehr ut de Welt schaffen kann. Kossen schall dat Depermaken fiefhunnert Millionen Euro. Stand: 25. Mai 2012 Klock 8:30

Wat dat Organspennen angeiht, dat will de Bunnesdag vundaag ganz nee beslüten. In tokamen Tied schall dat so ween, dat de Krankenkassen jümehr Versekerten fraagt, ob se jümehr Organe spennen wüllt, wenn bi jüm de Bregen al doot is. Se mütt denn blooß noch jo oder nee seggen. In´n Bunnesdag sünd se sik seker, dat dat för düssen Weg vundaag en grote Mehrheit geven ward. Stand: 25. Mai 2012 Klock 8:30

Vun vundaag af an steiht en eenunföfftig Johr olen Mann wegen Dootschlag vör´t Hamborger Landgericht. De Staatsanwaltschop schmitt em vör, he harr sien Fründin mit dat Kabel vun en Wiehnachtslichterkeed stranguleert. De föffteihn Johr ole Söhn harr sien Mudder een Dag later denn in de Wahnung funnen. Stand: 25. Mai 2012 Klock 8:30

Sünnschien, dröög Wedder un Temperaturen bet fiefuntwintig Graad, dorto lauen Wind vun Nordoost bet Oost, so geiht dat lange Weekenn bi uns loos. Dat dat öberhaupt en Drüppel vun baben gifft is to null Prozent möglich. Opstunns meet wi in Horborg veerteihn Graad.
De Utsichten:
Morgen so as hüüt: Sünnschien, dröög Wedder, Temperaturen bet veeruntwintig Graad. Stand: 25. Mai 2012 Klock 8:30

De eerste Börgermeister vun Hamborg, Olaf Scholz fordert, dat de düütschen Stroomnetten gau utbaut warrt. Dat dörf nich verslopen warrn, dormit ut de Energiewenn ok wat warrt, sä Scholz to NDR 90,3. In de Mitt vun Juni schüllt op de Ministerpräsidentenkonferanz Tietploons fastleggt warrn./Stand: 24.05.2012, Klock 8:30

De Böversten ut de Regeern vun de EU-Länner sünd sik eenig worden, dat se de Wirtschaft vun de Länner anstöten wüllt. Bunneskanzlersch Angela Merkel hett seggt, för dat tokomen Dropen an`t Enn vun Juni harrn de Politikers en groten Arbeitslist besloten. Se sünd sik eenig: ok wenn Länner wassen doot, köönt se liekers ehr Schulden afbauen./Stand: 24.05.2012, Klock 8:30

In Hamborg is gistern Obend de groot Wildswienjagd to Enn gohn. Een vun de Deerter harrn se in en Goorn in Winterhuud funnen. Dat Swien is eerst ruhig stellt un achteran in`n Klövensteen achtern Tuun bröcht worden. Een anner Deert weer gistern morgen al in de Elv jumpt. De Swien hebbt de Hamborger Polizei gistern den Dag över düchtig op Draff holen. Een drüttes Deert söökt se noch./Stand: 24.05.2012, Klock 8:30