Hamborg mutt sik beter praat maken för Krisen, Katastrophen oder goors ok för möögliche Kriegen. Dat hett Börgermeister Peter Tschentscher güstern bi en Veranstalten vun’e SPD seggt, wo ok Bunnsverdedigensminister Boris Pistorius mit biween is. Bavento hett dat heten, dat sik jüst so as de Bunnswehr, ok de zivilen Delen in uns Sellschop op de ne‘e Sekerheitslaag op’e Welt, de nu anners is, op instellen müssen. Tschentscher sä, dat sik de Lüüd in Hamborg op hebben müssen, dat dat deswegen ok in uns Stadt in de tokamen Johren ümmer wedder Katastrophenschuulöven geven deit.
Middenbinnen in’e Kries bi Volkswagen besöcht Bunnsweertschopsminister Robert Habeck vundaag dat VW-Wark in Emden. Vöraf sä he, dat de Bund un dat Land doröver nadenken deen, woans een dat Ünnernehmen ünner de Arms griepen kunn. In Emden schüllt denn de tokamen Tiet blots noch Elektroautos boot warrn. Man bi den Verkoop vun E-Autos in Düütschland haakt dat aver, nadem de Bunnsregeren de Koopprämien hierför streken hett. Habeck laadt nu aver Lüüd ut’e Branch för Maandag to en Krisendrapen in.
Israel hett den Süden vun’n Libanon vun’e Luft ut angrepen. Dat israel’sche Militär sä, dat se dat dorbi op de Positschonen vun de Terrorgrupp Hisbollah op afsehen harrn. Un dor hören ok üm un bi hunnert Afscheetrampen för Raketen mit to. In de Sekerheitskreisen vun’n Libanon snackt se vun en vun de swoorsten Angrepen, den Israel maakt hett, sietdem se beide in’n Oktobermaand dormit anfungen harrn, sik gegensietig to bescheten. Hüüt Avend snackt de UN-Sekerheitsraat bi en ielige Sitten över de aktuelle Laag.
Wenn de Tog nich kamen deit, denn liggt dat meisttiets doran, dat dor vun’t Personaal her Lüüd fehlen doot. Un dat is denn blangen de Strecken, de twei sünd, ok en vun de Grünnen mit, dat een sik op de Bahn nich mehr ganz so verlaten kann. Dor wiest Lüüd vun’e Warkschop vundaag op hen. Denn vundaag is in Düütschland de sonöömte „Dag vun’e Schien“. Un düssen Dag wüllt se dorför bruken, üm ne’e Lüüd för en Arbeitssteed bi de Bahn neeschierig to maken. In ganz Düütschland gifft dat hierto tweehunnertföfftig Veranstaltens. Un söven dorvun finnt in Hamborg statt.
De Hamborger Polizei hett twee Kneipen in Borgfeld dörsöcht. Dor güng dat bi üm mööglichen Drogenhannel. Bi den Insatz hebbt de Schandarms achtuntwintig Lüüd bi nakeken. Un söss vun jüm hölen sik illegal in Düütschland op. Deswegen hebbt se jüm nu ok eerstmal fastnahmen. Wat se ok Henwiesen op noch anner straafbor Doon funnen hebbt, dat hett de Polizei bet nu noch nich seggt.
Nu also doch: Do grote Jucho Portalkraan, de een bi de vörmalige Sietas-Warft in’t Oog fallen deit, de blifft nu doch bestahn. De ganzen Kraans dor in Neefeld staht af nu foorts ünner Denkmaalschuul. Dat sä de Kulturbehöörd, dat dat stimmen dee. Egens harrn Arbeitslüüd al dormit anfungen hatt, de Kraans dor aftoboen. Man nu geiht dat aver üm dat Gegendeel un de Fraag, woans een de Kraans dor bewohren kann. Denn egens sünd de verköfft un schullen dor weghaalt warrn.
Gröttstendeels sünd de Wulken al överall verswunnen un de Sünn schient. Alltohoop kaamt wi vundaag so op üm un bi teihn bet ölven Stünnen, wo wi de Sünn geneten köönt. Un ok de Temperaturen kaamt so bilütten in’e Gang. Opstunns sünd dat föffteihn Graad in Langenhoorn. Op bet to veeruntwintig Graad kaamt wi vundaag woll noch. Un morgen geiht dat Ganze denn noch mal so wieder. De Sünn schient un dat blifft dröög bi Temperaturen dor denn vun bet to dreeuntwintig Graad.
