Norichten op Platt

Wat den Wiederbo vun de Elvphilharmonie bedrifft kriggt se sik jo jümmers wedder in de Wull. Nu warrt dat wull noch en wiederen Parlamentar‘schen Ünnerseukungsutschuss geven. Dat kunn en güstern in den Huusholtsutschuss vun de Börgschop rutheuren. De Utschuss wull vun Börgermester Olaf Scholz weten, woso Hochtief noch eenmol hunnertfiefunnegentig Euro mehr för dat Konzerthuus in Hals steckt warrn sall. Man Scholz weer güstern nich dor. Nu gläuvt de Greunen, dat he wat to verbargen hett.
/ Stand: 15.06.2013 Klock 8:30

Dor wo de Lüüd dat Woter vun de Elv bet to´n Hals steiht warrt dat nu bilütten´n beten beter. In´t schleswig-holsteinsche Lauenborg sett de Insatzkräfte nu Pumpen in, dormit se de Stroten wedder vun´t Woter free kriggt. Vunmorgen dröfft de Lüüd in de Altstadt ok wedder in ehr Hüüs rin. In´t neddersass‘sche Hitzacker kunn´n de Minschen al güstern wedder in ehr Hüüs trüch.
/ Stand: 15.06.2013 Klock 8:30

Vun hüüt op an kann jedeen Internetnutzer de Nomen un Doten vun mehr as hunnertdusend Treuhandsellschopen un Bedrieven in Stüeroasen sehn. No dem wat de NDR un de Süddüütsche Zeitung rutkregen hebbt, warrt dat Internatschonole Konsortium für Investigativen Journalismus en Deel vun de so nöömten "Offshore-Leaks"-Doten in´t Nett setten. Dormit sall kloor ruttokennen ween, wat so aflöppt. Passkopien, Kontonummern or anner Soken, de nüms wat angohn, süllt aver nich öffentlich mookt warrn.
/Stand: 15.06.2013 Klock 8:30

De Bezirksversammeln Altno hett sik dorop enigt, dat Libyen-Flüchtlinge för soss Moond blieven künnt. Greune, Linke un FDP hebbt dormit tosomen gegen de Sozioldemokroten afstimmt. De Andrag fördert nicht blots dat Recht to´n Blieven, nee, ok dat Verläuven to´n Arbeiden för de Afrikoons.
/ Stand 15.6.2013 Klock 8:30

Dat gifft in Hamborg jo jümmers mehr Abiturienten an de Stadtdeelscholen. Opletzt hebbt tosomen veerhunnert-dortig junge Lüüd an de niegen Stadtdeelscholen ehr Reifezeugnis kregen. Bet övermorgen fiert de Schoolsenater Ties Rabe an düsse twölf Scholen mit all de dat schafft hebbt den Afsluss.
/ Stand: 15.6.2013 Klock 8:30

De Hamborger Polizei un de Füerwehr harrn bet Klock ölven an Avend fix to dohn, dat se de Autobohn A söven wedder kloor kriggt. Dor is en Tankwogen in Elvtunnel en Deel vun sien Rapsölfuder fleiten gohn un hett dormit för´n kilometerlangen Stau sorgt. No dem wat de Polizei seggt, sünd bannig veel Wogens dörch de Ölspoor no Süden fohrn un hebbt dat Öl bet to de Gegend vun Haven bi Waltershoff verdeelt.
/ Stand: 16.06.2013 Klock 8:30

Dat Wedder för Hamborg fangt vunmorgen wunnerscheun mit Sünnschien an. Man, dat mütt ji geneten, denn an Nomeddag süht dat all´ns wedder anners ut. Denn kümmt dat orrnlich natt vun boven. Kann ween un dat gifft ok mol Dunner un Blitz. De Temperaturen kladdert op bet to dreeuntwintig Grad. Nu meedt wi in Billbrook al ölven Grad.

Morgen wesselt sik Sünn un Wulken af. Jümmers wedder mol gifft dat´n poor lütte Schuer, ok wenn´t mehrstentiets dreug blifft. De Temperaturen schafft dat denn noch bet to twintig Grad.

Ok an Moondag is vun Sünn, över Wulken bet to Regen un Gewitter un Temperaturen bet to veeruntwintig Grad all´ns drin.

/ Stand: 15.06.2013 Klock 8:30

Atom- un Gefohrgoottransporte in´n Hamborger Haben ward se nich scharper kontrolleern as vörher. Gröne un Linke harrn in de Börgerschop dor en Andrag för stellt, na dat dat op den Frachter Atlantic Cartier brinnt harr. Wat dat Parlament aber maakt hett, dat hett mit grote Mehrheit en Staatsverdrag mit Muslime un Aleviten opstellt. Nu hebbt se dat Recht, dat se an jümehr höögste Fierdaag freenehmen künnt. I Stand: 14.06.2013 Kl. 8:30

De Deepgaraasch in de ollen Esso-Hüüs op Sankt Pauli ward se foorts dichtmaken. Dat harr jo en nee Gootachten geven öber den Komplex dor. De Bezirk Hamborg-Mitte harr den Egendömer opföddert, he schull de Hüüs wedder op Schick bringen. En Initiatiiv vun Lüüd, de dor wahnt is nu aber bang. Dor mit ward dat wohrschienlicher, dat de Gebüden afreten ward, seggt se. I Stand: 14.06.2013 Kl. 8:30

In Hitzacker in Neddersassen künnt de Lüüd ut de Ollstadt siet vunmorgen wedder trüch in jümehr Wahnungen. De Pegel is daal op söben Meter fiefunsöbentig. Hölpslüüd un Behörden hoolt sik aber liekers noch praat. In Lauenborg in Schleswig-Holsteen is dat noch nich rut, wannehr de Lüüd wedder in de Ünnerstadt wahnen künnt. I Stand: 14.06.2013 Kl. 8:30