Narichten op Platt

Ut Hamborg und de wiede Welt von maandaags bit sünnavends Klock 9.30 - die aktuellen Nachrichten auf Plattdeutsch hören Sie von Montag bis Freitag um 9.30 Uhr bei NDR 90,3

Binnenutschuss snackt över G-Twintig

De Hamborger Börgerschop hett dormit anfungen, sik dat nochmal nipp un nau antokieken, wat dor op dat G-Twintig Drapen an Gewalt passeert is un wo de Polizei dorop reageert hett. In en Sitten vun´n Binnenutschuss, de mehr as acht Stunnen duert hett, dor hebbt de Insatzleiters seggt - de Laag in´t Schanzenveerdel, de is wull noch leger west, as en dat be nu to weten kregen hett.
SPD un Gröne hebbt den Andraag vun de Opposition aflehnt, dat dat wat de Polizei dorto to seggen hett, vun de Tiet her ingrenzt warrt. CDU, FDP un Linke hebbt dorüm bi de Befragen nich mitmaakt. Stand 20.07.2017 Kl. 9:30

Rode Flora seggt wat to G-Twintig

De Aktivisten vun de Rode Flora wüllt vunavend op de Fragen vun de Anwahners in´t Schanzenveerdel antern. In en Stadtdeelversammeln in´t Millerntor-Stadion wüllt se ünnern annern verkloren, wat för en Rull de Rode Flora bi de Krawalle bi´t G-Twintig Drapen speelt hett. Güstern avend hebbt ´n poor Hunnert Minschen friedlich dorför demonstreert, dat dat links-autonome Kulturzentrum dor blieven schall. Stand 20.07.2017 Kl. 9:30

Törkei: Gabriel plaant diplomat´sche Schreed

De Törkei mutt mit wiedere diplomat´sche Schreed vun de Bunnsregeren reken. Butenminister Sigmar Gabriel will vundaag seggen, wat he vörhett vun wegen dat se twee Minschenrechtlers insparrt hebbt. To´n Bispill kunn Gabriel de Reisehenwiesen för de Törkei strenger maken un so vor Reisen in dat Land wohrschauen. // Stand 20.07.2017 Kl. 9:30

Trump wendt sik vun sien Justizminster af

US-Präsident Donald Trump wendt sik vun sien Justizminister Jeff Sessions af. In en Interview mit de "New York Times" sä Trump, dat deit em Leed, dat he Sessions överhaupt för den Posten opstellt harr. Achtergrund is, dat de Justizminister in März seggt hett, he mutt sik dor rutholen, wat de Russland-Ünnersöken vun´t FBI angeiht. He weer dor nich free in sien Menen. // Stand 20.07.2017 Kl. 9:30

Urdeel över Brandanslääg op Mopo

Vundaag schall en Urdeel kamen. Dat geiht in den Perzess üm twee Brandanslääg op dat Verlagshuus vun de Hamborger Morgenpost un de Max-Brauer-School in Altona. De veer Lüüd, de vör Gericht staht, schüllt dat in´t Januar tweedusendunfoffteihn maakt hebben. Se hebbt sik wull över de Mohammed-Karikarturen vun "Charlie Hebdo" argert, de de Mopo na denn Terroranslag op dat Pariser Satire-Magazin nadruckt hett.// Stand 20.07.2017 Kl. 9:30

Peking kümmt na Hamborg

Na mehr as veertig Johr in New York hett dat Museumsschipp Peking in de US-Metropole afleggt un is nu op den Weg na Hamborg. Övern den Atlantik geiht de histor´sche Veermastbark in en Dockschipp. De Överfohrt warrt bummelig eenanhalf Weken duern. Na dem se se op Schick bröcht hebbt, kann man de Peking denn as Museumschipp vun´t Düütsche Hobenmuseum ankieken.// Stand 20.07.2017 Kl. 9:30

Exakt un kompakt - Dat Wedder för uns in Hamborg

Vundaag wesselt sik Sünn un Wulken af. Oft hebbt wi ornlich Wulken ut de toeerst blots af un to mal Flöög oder Gewidder daalkaamt. Övern Dag besünners to´n Namiddag hen, gifft dat mehr un to´n deel uk dulle Gewidder. De künnt uk richtig rusig warrn mit Starkregen, Hagel un stürm´sche Böen. Dat is bruttig bi bet to fiefuntwintig Graad. Opstunns meet wi bi ju op Finkwarder negeneihn Graad. Wenn dat nich jüst gewiddert, weit de Wind flau ut dreiht op Süüdwest bet West.
De Utsichten:
Morgen hebbt wi en Tiet lang Sünn, denn mal wedder Wulken. Dat blifft meist dröög. Besünners an´n Namiddag is dat recht fröndlich bi bet to fiefuntwintig Graad. // Stand 20.07.2017 Kl. 9:30

G-Twintig-Krawalle ward oparbeidt

Över de Krawalle bi dat G-Twintig-Drepen in Hamborg wüllt se hüüt in den Binnenutschuß vun de Börgerschopp schnacken. In en Sitten buten de Reeg antert Binnensenater Andy Grote un de Baaslüüd vun de Polizei op Fragen, de de Afordneten to de Polizeiinsätz hebbt. Bi de Randale weern poor hunnert Polizisten an´n Lief to Schaden kamen. De Versekerer dinkt, dat dor en Schaden vun bet to twölf Millionen Euro entstahn is. / Stand: 19.07.17 Klock 09:30

Podcast

Narichten op Platt als Podcast

NDR 90,3

Ut Hamborg und de wiede Welt von maandaags bit sünnavends: die aktuellen Nachrichten auf Plattdeutsch. mehr

Wi snackt Platt

NDR 90,3

Geschichten von uns Schrievers, Klönsnack mit Buurn, Handwarkers und Seelüüd, Leder von Godewind, Richard Germer und Heidi Kabel - jeden Sünndag Klock 8.30. mehr

Hör mal 'n beten to: Plattdeutsche Mittagsplauderei

Die plattdeutsche Mittagsplauderei hören Sie immer montags bis samstags um 13.20 Uhr bei NDR 90,3. mehr

De Welt snackt Platt

In de plattdüütsche Welt vun NDR.de hebbt Se alle plattdüütschen Sennungen op een Blick. Hier gifft dat ook Norichten op Platt un een beten wat to de Geschicht vun de plattdüütsche Spraak. mehr

Dat Plattdüütsche Hörspeel

Familiengeschichten, Krimis und Erzählungen: Alle zwei Wochen sendet jede Landeswelle des NDR ein plattdeutsches Hörspiel. Sehen Sie hier die Hörspiele und Sendetermine im Überblick. mehr

Mehr Kultur

00:38 min
03:52 min